DK's BLOG

啱啱返到屋企，沖完涼，等啱啱煲嘅滾水攤凍啲，沖蛋白質飲。

今晚係Yin嘅舊歷生日，響度同佢講聲生日快樂先。啱啱同佢睇完《風雲決》返來，有少少夜。頭先仲諗住食埋宵夜先返架，好彩冇。因為家陣仲要每日換藥，本唻同阿爸講咗話聽朝早先換過啲藥，點知阿爸竟然等我返來。 好感動啊。其實頭先有打俾烏龜架，點知佢同冬瓜，小黑已經食緊，仲就來食完添，跟住就打俾李承錛，想話出來聚下咁，點知佢又啱啱返到屋企，唔想再出返唻。 咪算lor。返到屋企自己食啲嘢就算喇。

本來諗住聽日開始做返gym，但係只手又未好返嗮，唔知點算好。計計下都已經成3個禮拜冇去葛喇， 或者我可以做住啲唔駛用手嘅項目先，但係咁樣又好似冇乜癮咁。

講返電影啊，老實講嬤嬤地lor，成個廳得5個人響度睇。 動畫就勉勉強強喇，但係個配音真係好屎！ 聽到任賢齊把聲就想笑，佢唱歌都ok嘅，但係配音wor，真係唔係好啱佢。仲有謝霆鋒，佢本身嘅普通話都唔多掟喇，仲揾去配。 都唔知啲人係諗乜嘢嘅！一句講嗮，45蚊一張飛絕對唔抵！蝕嗮！！

去沖蛋白質飲喇，寫住咁多先。早抖！

Popularity: 18% [?]